យ៉ាងហោចណាស់ ក៏មានពលករខ្មែរប្រមាណជា ២០ នាក់ ក្នុងចំណោមពលករទាំង ៣០ នាក់ផងដែរដែលត្រូវបានក្រុមទាហានឈុតខ្មៅថៃចាប់ខ្លួនបាន កាលពីម្ស៉ិលម៉ិញនេះខណៈដែលពួកគេទាំងអស់គ្នាបានធ្វើដំណើរតាមការអូសទាញអំពីសំណាក់មេឈ្មួញខ្មែរ ថៃធ្វើការបោកបញ្ឆោតចូលទៅធ្វើការនៅក្នុងតំបន់ហាមឃាត់របស់ថៃ ដើម្បីត្រៀមខ្លួនដើម្បីកកាប់ឈើគ្រញូងដោយខុសច្បាប់ ។
យោងតាមអ្នកឆ្លងឆ្លើយព័ត៌មាន មានបញ្ញវ័ន្តខ្មែរ នៅប្រទេសថៃបានអោយដឹងថា ៖ ការឃាត់ខ្លួនពលករខ្មែរ ខាងលើនេះ គឺត្រូវបានធ្វើឡើងកាលពីថ្ងៃទី១១ ខែសីហា ឆ្នាំ២០១៨ ក្នុងតំបន់ឧទ្យានជាតិ ថាប់ឡាន ស្ថិតក្នុងឃុំឡាំភៀក ស្រុកខនបុរី ខេត្តនគររាជសីមា ប្រទេសថៃ ដែលមានពលករខ្មែរទាំងអស់មានចំនួនរហូតដល់ទៅ៣០នាក់ឯណោះ។ ប៉ុន្តែការឃាត់ខ្លួនបានត្រឹមតែ ២០នាក់ប៉ុណ្ណោះ ចំណែក១០ទៀតបានរត់ប្រាស់អាយុគេចខ្លួនបាត់អស់ ។
ពលករខ្មែរម្នាក់ក្នុងចំណោមពលករទាំងអស់ដែលត្រូវបានឃាត់ខ្លួនបានសារភាពប្រាប់អាជ្ញាធរថៃអោយដឹងថា ពួកគេទាំងអស់មានគ្នា៣០នាក់ ដោយត្រូវបានមេឈ្មួញខ្មែរ និងថៃដឹកនាំមកកាន់តំបន់នេះដោយម្នាក់ៗត្រៀមនូវស្បៀងអាហារ និងឧបករណ៍គ្រប់យ៉ាង សម្រាប់ទុកបំរុងប្រើប្រាស់ក្នុងការកាប់ឈើគ្រញូងនៅក្នុងតំបន់ហាមឃាត់ខាងលើ ។
ពលករនោះបានបញ្ជាក់បន្ថែមថា ក្រោយពេលដែលពួកគេត្រូវបានមេឈ្មួញដឹកយកមកទំលាក់ចោលក្នុងព្រៃនេះរួចហើយ ពួកឈ្មញួទាំងនោះក៏បានចាកចេញទៅបាត់អស់ ដោយទុកអោយពលករទាំងអស់រៀបចំឧបករណ៍ដើម្បីត្រៀមកាប់ឈើ ប៉ុន្តែជាអកុសល ពលករខ្មែរមិនទាន់ទាំងបានកាប់បានឈើមួយដុំផង ក៏ត្រូវក្រុមទាហានឈុតខ្មៅថៃឡោមព័ទ្ធនិងចាប់ខ្លួនក្របួចជាប់ក្រញ៉ង់តែម្តង ។
បច្ចុប្បន្ននេះ គេនៅមិនទាន់ដឹងបាននៅឡើយទេថាតើជោគវាសនាពលករទាំង ២០ នាក់នោះ និងត្រូវបានអជ្ញាធរថៃចាត់បញ្ជូនទៅដល់ក្រហែងណានៅឡើយទេ ។
ម្យ៉ាងវិញទៀតសោត ចំពោះពលករ ១០ នាក់ទៀត ដែលកំពុងរត់គេចពួនសំងំក្នុងព្រៃប្រទេសថៃ ក៏នៅមិនទាន់ដឹងថា និងទៅជាយ៉ាងណាដែរ ព្រោះគ្មានស្បៀងជាប់ខ្លួនបន្តិចបន្តួចទាល់តែសោះ ព្រោះស្បៀងអាហារ និងសម្ភារៈដែលត្រៀមបំរុងទត្រូវបានទាហានថៃប្រមូលយកគ្មានសល់ឡើយ ៕