ខេត្តប៉ៃលិន ៖ កាលពីវេលាម៉ោង ០៨:៣០ នាទី ថ្ងៃទី១០ ខែតុលា ឆ្នាំ២០១៨ សមត្ថកិច្ចឃាត់ខ្លួនជនសង្ស័យម្នាក់ ឈ្មោះ អេង ឡុង ភេទប្រុស អាយុ ៥៣ឆ្នាំ ជាតិខ្មែរ មុខរបរ ជាសមាជិកក្រុមប្រឹក្សាឃុំស្ទឹងកាច់ស្រុកសាលាក្រៅ ខេត្តប៉ៃលិននិងរស់នៅភូមិអូរបេង ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
សមត្ថកិច្ចបានឲ្យដឹងថា ជនរងគ្រោះម្នាក់ក្នុងចំណោមជិត៥០នាក់ មានឈ្មោះ គង់ ស្រី ភេទស្រី អាយុ ៥៩ឆ្នាំ ជាតិខ្មែរ មុខរបរ ជាមេភូមិអូររអិលឃុំកើតហេតុខាងលើបានមកដាក់ពាក្យបណ្តឹងដល់សមត្ថកិច្ចទើបធ្វើការឃាត់ខ្លួនមកសាកសួរ។
ប្រភពដដែលបានបញ្ជាក់ថា ក្រោយពីការសួរនាំជនសង្ស័យបានទទួលស្គាល់ និងសារភាពថា ខ្លួនបានទទួលប្រាក់ពីឈ្មោះ គង់ ស្រី ចំនួន ៨៩,៥០០$ (ប្រាំបីម៉ឺនប្រាំបួនពាន់ប្រាំរយដុល្លារសហរដ្ឋអាមេរិកគត់) ស្មើចំនួនៈ ៤៩ នាក់ ដើម្បីរត់ការចូលក្របខ័ណ្ឌនគរបាលខេត្តប៉ៃលិន។ ចំពោះប្រាក់ទាំងនោះជនសង្ស័យបានយកទៅចាញ់ល្បែងនៅកាស៊ីណូ និងផឹកស៊ីអស់ហើយគ្មានលុយសងវិញទេ ។
បច្ចុប្បន្នជនសង្ស័យកំពុងធ្វើការឃាត់ខ្លួននៅស្នងការដ្ឋាននគរបាលខេត្តប៉ៃលិន ដើម្បីកសាងសំណុំរឿង និងបញ្ជូនជនសង្ស័យទៅអយ្យការអមសាលាដំបូងខេត្តប៉ៃលិនអនុវត្តតាមនីតិវិធីបន្ត។
ចំណែកពលរដ្ឋសង្ឃឹមថា ខាងសមត្ថកិច្ចពិសេសខាងប្រព័ន្ធតុលាការនឹងចាត់ការដោយយុត្តិធម៌ជូនពួកគាត់ដោយមិនគិតពីបក្សពួកនិងតូនាទីឡើយ ៕
