នៅថ្ងៃទី២៧ ខែសីហា ឆ្នាំ២០១៩ មានការប្រារព្វកិច្ចប្រជុំរវាងឧត្តមក្រុមប្រឹក្សាពិគ្រោះយោបល់ និងអង្គភាពប្រឆាំងអំពើពុករលួយ នៅក្នុងបរិយាកាសពោរពេញទៅដោយភាពចាក់ឆ្កឹះឆ្កៀល ដេញដោលចាក់ដោត អំពីបញ្ហាប្រឆាំងអំពើពុករលួយនៅក្នុងប្រទេស ដែលអាចត្រូវប្រមាថនិងចំអក ។
ឯកឧត្តម នួន សុខាវី សមាជិកឧត្តមក្រុមប្រឹក្សាពិគ្រោះនិងផ្ដល់យោបល់ មកពីគណបក្សពន្លឺថ្មី បានលើកឡើងនិងចោទត្រង់តែហ្មងថា ពាក់ព័ន្ធដល់បញ្ហាពុករលួយ គឺអង្គភាពប្រឆាំងអំពើពុករលួយនេះឯង ហើយដែលពុករលួយខ្លាំងជាងគេ បើមិនមានសច្ចធម៌ទេនោះ។
ឯកឧត្តម ឱម យិនទៀង ប្រធានអង្គភាពប្រឆាំងអំពើពុករលួយមានប្រសាសន៍ថា ការពោលពាក្យបែបនេះ វាដូចជាមើលងាយអង្គភាពឯកឧត្តមពេកហើយ ព្រោះកន្លងមក អង្គភាពរបស់ឯកឧត្តម បានខិតខំប្រឹងប្រែងណាស់លើការប្រឆាំងអំពើពុករលួយ រហូតចាប់ជនល្មើសបានជាច្រើនទៀតផង។
ឯកឧត្តម នួន សុខាវី បានបន្ថែមសំនួរថា អញ្ចឹងពាក់ព័ន្ធនិងអំពើពុករលួយតើវា បានថមថយចុះឬកើនឡើង សូមធ្វើការបញ្ជាក់អោយច្បាស់ផង? យ៉ាងសំនួរនេះ ឯកឧត្តម ឱម យិនទៀង មិនឆ្លើយបញ្ជាក់សោះឡើយ។
ទាក់ទងបញ្ហានេះ យើងសង្កេតឃើញថា ៣ឆ្នាំកន្លងមកនេះ អង្គភាពប្រឆាំងអំពើពុករលួយ ហាក់ដេកលង់លក់ស្រមុកខុលត្រជាក់ស្ហឹម នឹងមិនមានសកម្មភាពអ្វីគួរគាត់នោះឡើយ។
អង្គភាពប្រឆាំងអំពើពុករលួយទើបភ្ញាក់ពីដេក ហើយភ្ញាក់ក្រញែងក្រញ៉ាងចាប់ផ្ដើមធ្វើការវិញនៅពេល ដែលគណ:កម្មការជាតិទប់ស្កាត់ បង្ក្រាបបទល្មើសធនធានធម្មជាតិដឹកនាំដោយនាយឧត្តមសេនីយ៍ សៅ សុខា ចាប់ផ្ដើមបង្ក្រាបឈ្មួញឈើខុសច្បាប់តែប៉ុណ្ណោះ។
ឯកឧត្តម នួន សុខាវី សំណូមពរអោយអង្គភាពប្រឆាំងអំពើពុករលួយ ត្រូវប្រកាន់នូវភាពយុត្តិធម៌ សច្ច:ធម៌ និងត្រូវតែចាត់វិធានការណ៍លើជនពុករលួយ អោយតែមានតម្រុយ មិនចាំបាច់មានគេប្ដឹងទេ ព្រោះអង្គភាពប្រឆាំងអំពើ ពុករលួយមានសិទ្ធិគ្រប់គ្រាន់ស្រាប់ទៅហើយ ៕