ភ្នំពេញ៖ រដ្ឋាភិបាលកម្ពុជាគ្រោងនឹងសាងសង់ទីក្រុងថ្មីមួយឈ្មោះ «ទីក្រុងនាគរាជសម្តេចតេជោ» ស្ថិតនៅប្រជុំរវាងទន្លេសាប និងទន្លេមេគង្គ ដែលនឹងចំណាយទឹកប្រាក់ខ្ទង់ ៨០ ពាន់លានដុល្លារ តែបច្ចុប្បន្នកំពុងស្វះស្វែងរកដៃគូវិនិយោគពីវិស័យឯកជន ដើម្បីដំណើរការគម្រោងមួយនេះ។
រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ លោក ភឿង សុភ័ណ្ឌ បានឆ្លើយតបថា រដ្ឋាភិបាលពិតជាបានគ្រោងសាងសង់ទីក្រុងថ្មីនេះពិតមែន ដោយត្រូវចំណាយពេលយូរដល់ទៅ ១០ ឆ្នាំ ទើបសាងសង់រួចរាល់ ខណៈប្លង់មេបានរៀបចំរួចស្រេចហើយ រង់ចាំតែថវិកាធ្លាក់មកប៉ុណ្ណោះ។ ដោយសារមិនចង់ចំណាយទឹកប្រាក់ច្រើនសន្ធឹកសន្ធាប់បែបនេះ ទើបកំពុងស្វែងរកដៃគូរសហការពីវិស័យឯកជន ឯរឿងទីតាំងលោកមិនទាន់អាចបញ្ជាក់បាននៅពេលនេះនៅឡើយទេ។
លោក ភឿង សុភ័ណ្ឌបានបន្តថា «៥៨០ឆ្នាំហើយ កម្ពុជាអត់ដែលសាងសង់ទីក្រុងថ្មីអីនោះទេ…អ៊ីចឹងហើយទើបយើងគ្រោងនឹងសាងសង់ទីក្រុងថ្មី ដាក់ឈ្មោះថា «ទីក្រុងនាគរាជសម្តេចតេជោ» ដើម្បីឲ្យត្រូវនឹងឆ្នាំកំណើតរបស់សម្តេច»។ នេះបើតាមការស្រង់សម្តីរបស់កាសែតភ្នំពេញប៉ុស្តិ៍។
អគារក្នុងទីក្រុងនេះនឹងរចនាដូចរូបនាគផុសចេញពីដី និងមានរៀបចំហេដ្ឋារចនាសម្ព័ន្ធផ្លូវក្រោមដី ផ្លូវគោក និងផ្លូវទឹក ដែលជាប្រភេទរចនាបទខ្មែរ។ គម្រោងទីក្រុងថ្មីនេះ ធានាថាមិនមានបញ្ហាចរាចរណ៍បានរយៈពេល ៥០០ឆ្នាំទៅមុខទៀត។ លោក ភឿង សុភ័ណ្ឌ បន្ថែម។
យ៉ាងណាគម្រោងការសាងសង់ទីក្រុងថ្មីនេះ មានម្ចាស់ក្រុមហ៊ុនអចលទ្រព្យមួយចំនួនបង្ហាញទស្សនៈវិជ្ជមានផងនិងអវិជ្ជមានផង។ ជាក់ស្តែង លោកឧកញ៉ា លី ហួរ ប្រធានសមាគមអ្នកអភិវឌ្ឍន៍លំនៅដ្ឋានកម្ពុជា ថាលោកគាំទ្រលើគម្រោងសាងសង់ទីក្រុងថ្មីនេះ គ្រាន់តែថាការនិយាយវាស្រួលជាងការធ្វើ ដែលមានទីក្រុងត្បូងឃ្មុំជាឧទាហរណ៍ស្រាប់ មកទល់ពេលនេះមិនទាន់ឃើញមានអ្វីជាដុំកំភួនគួរឲ្យកត់សម្គាល់ឡើយ។
ចំណែកអគ្គនាយកក្រុមហ៊ុន Century21 Mekong លោក ច្រឹក សុខនីម ក៏បង្ហាញទស្សនៈថា ការសំខាន់ត្រូវមានប្លង់មេណាមួយអោយច្បាស់លាស់សិន មិនមែនគ្រាន់តែគ្រោងចោលតែមួយមុខនោះទេ គឺត្រូវច្បាស់លាស់។ ម្យ៉ាងទៀតលោកថាទីក្រុងធំបែបនេះ មិនមែនសាងសង់១ឆ្នាំ ឬ២ឆ្នាំទេ វាត្រូវការរយៈពេល១០ឆ្នាំឡើងទៅ ព្រោះវាជាពេលវេលាសមស្រប ដោយសារកំណើនប្រជាសាស្ត្រ និងប្រាក់ចំណូលប្រជាជនក៏កើនឡើង៕
